ديميلور ساهل ديال الدار أحسن 1000 مرة من ديميلور الجاهز
مساء النور الغزالات آش خباركم
اليوم جبتلكم هاد ديميلور ساهل ديال الدار اللي كنستعمل أقسم بالله فعال 1000 مرة على دوك اللي كنشريوا ، و للاشارة فقط نصيحة صغيرة مني اعطيوهم التيساع راه الى كانت شي مادة كتخرب الشعر فهوما اللي كيخربوه !!
مللي كتوضعيه على شعرك و هو فازك كيجيك رطيطب غير كتغسليه و ينشف كيبدا يتكسر و يتقصف ، و راه بصراحة كلهم بحال بحال راني جربت من الرخيييص حتى للغآآالي و وآآلو سلعة واحدة كيصاوبوه مؤقتا من بعد يخرجوا عليه .
ايوا حلوا عويناتكم معايا دابا و سجلوا هادشي اللي غنقولكم ، نبداو بالمقادير بعدا :
غناخدوا أولا واحد اليوغورت مسوس
بالنسبة ليا أنا كناخد غير النص ، أما اللي شعرها طويل فايت نص ظهرها ممكن تستعملوا كامل و تضوبل المقادير
من بعد كنزيد عليه 2 ملاعق كبار ديال حليب الكوك ، و هنا سمحولي لأنني رميت البواط ديالها و لكن راه قربات تسالى ليا ان شاء الله منين نشريه عاود نوريه لكم ، و على العموم راه ما غاليش ثمنه 16 درم تلقاوه فأسيما جنب البواطات ديال ليس les champignons ، المهم نزيدوا منه 2 ملاعق كبار على اليوغورت
و ناخدوا نص سيطرونة
نعصروها مزيان و نزيدوها على الخليط
من بعد ناخدوا ملعقة صغيرة عامرة ديال العسل
و نخلطوا كلشي مزيان
من بعد كناخدوا شي زيت مرطب ، ممكن تستعملوا غير زيت الزيتون و لا زيت اللوز و لا أركان و نخلطوا الكل مزيآآن و ها هو وآجد
طريقة استعمال ديميلور ساهل ديال الدار :
طبعا عادية ، كنغسل الشعر بالشمبوان مزيان و نعصروا مزيآآن و ندوزو فوق منه الفوطة حتى ينشف شوية ما يبقاش يقطر ، من بعد نطلي هاد الخليط لراسي و ضرووووري نحط شي بونيه فوق راسي ، و يبقى لأطول مدة تقدروا تخليوه ، يعني على الأقل 30 دقيقة على الأقل ، و فهاد الوقت طبعا انتاهزوا الفرصة و ديروا شي حاجة للجسم أو حكوا ظفاركم و الأقدام …الخ ، اعطا الله ما يتدار أنا 45 دقيقة اللي كنخليه ديما .
من بعد يتغسل بالماء و لكن مآاشي بزاف يعني غير ما تبقاوش تشوفوا الما أبيض يعني صفا باراكا من الغسيل حبسوا ، و مللي تنزلوا دهنوا بكريم الدهن و لا باش موالفين كتدهنوا ، أنا كندير السيروم ديال L’Oréal بصراحة أحسن واحد استعملت لحد الآن أحسن حتى من داك frizz ، كناخدوا من أسيما ب 100 درهم
المقابط ديال الباتشا ، احسن اختراع ههههههههه ، كندور الشعر لليمين واحد ساعة و نعاودوا لليسار ساعة أخرى حتى ينشف تماما ، و تمتعوا ليا بالزغيبات ، و طبعا مع المداومة و مرة على مرة كيبآان الفرق ، أنا دابا هادا هو آخر بروكرام كندير و الحمد لله وافقني بزآآآآآآاف و رجع ليا شعري غزآل ، طبعا مع الماسكات قبل الشمبوان من مرة حتى ل 2 مرات فالأسبوع .
و ملاحظة صغيرة هاد ديميلور ساهل ديال الدار مع المداومة كيطول الشعر فوقت قصير لأن فيه حليب الكوك هو معروف كيدفع الزغبة .
ايوا شي دعيوات الغزالات
تقبلوا مودتي
تعليقات